LEGAZPI CITY-Nagsakat na sa 15,146 an nairehistrong kaso nin dengue sa bilog na Bicol Region, na may 63 na binawian nin buhay, basado sa datos kan Regional Epidemiology and Surveillance Unit kan DOH Bicol hasta Oktubre 7, 2026.
Segun sa datos, nairehistro an mga kaso puon kan Enero kan presente na taon, mantang padagos na minomonitor kan mga health officials an sitwasyon sa rehiyon.
Sa Albay, idineklara an state of calamity kan Setyembre 10 huli sa paglangkaw kan mga kaso nin dengue.
Nag-activate man an DOH Bicol nin Code Blue kan Setyembre, bilang parte kan mas pinakusog na preparasyon asin pagresponde sa paglangkaw kan mga kaso, kaiba an pag-aktibar kan Incident Management Team (IMT) asin pressure sa kapasidad kan mga ospital.
Nagsagibo man nin daily reporting kan mga kaso puon kan ika-30 na morbidity week, alinsunod sa mas pinakusog na disease surveillance asin mandatory reporting na may kinaaraman sa Republic Act No. 11332, o an Mandatory Reporting of Notifiable Diseases and Health Events of Public Health Concern Act.
Basado sa datos na ipighayag, nag-peak an mga kaso sa ika-36 na morbidity week, mantang nagpahiling man nin pagbaba an mga nairehistro kaso pag-abot kan ika-40 na morbidity week na may tulong kumpirmadong kaso.
Mientrastanto, posibleng maglangkaw pa an mga kaso nin dengue sa panahon nin El Niño huli sa pagtaas kan metabolic activity kan mga lamok, na kaiba an epekto kan halawig na tagtuyot asin mainit na panahon, segun sa mga eksperto asin sa Department of Health.
Sa datos man hasta Oktubre 7, nasa 79.33 porsyento an hospital occupancy rate, base sa impormasyong itinao sa interview.
Padagos an pangapudan sa publiko na maghanap asin maglinig kan mga posibleng pinamumugaran nin lamok, maggamit nin proteksyon kontra kagat nin lamok, asin magpakonsulta sa doktor kun may sintomas nin dengue.
