LEGAZPI CITY-Nagtetenir na pangenot na prayoridad kan Kamara de Representantes sa propwestong 2027 national budget, mantang an pondo para sa health sector nadugangan na nin P12.23 bilyon.
Sa irarom kan House General Appropriations Bill na inaprobaran sa ikaduwang pagbasa, nagtetenir sa P1.107 trilyon an budget para sa edukasyon.
Itinagama man an dugang na P10.055 bilyon para sa mga programa kan sektor, kabali na an tabang pinansyal para sa mga estudyante, school rehabilitation, school safety, asin pag-address kan learning loss.
Kabali man digdi an P2.1 bilyon para sa Tertiary Education Subsidy, P1.77 bilyon para sa Tulong Dunong Program, asin P952 milyon para sa konstruksyon asin paghirahay kan mga pasilidad kan eskwelahan.
Mientrastanto, naglangkaw sa P358.82 bilyon an propwestong budget para sa salud, na mas halangkaw sa P346.59 bilyon na nakalista sa National Expenditure Program (NEP).
Sa dagdag na pondo para sa serbisyo sa salud, P23.97 bilyon an itinagama sa Medical Assistance Program nganing mapalawig an medical aid asin masuportahan an zero-balance billing sa mga pampublikong ospital.
Segun ki House Appropriations Committee Chairperson Rep. Mikaela Angela B. Suansing, pigsierto kan Kamara an preserbasyon kan total na budget sa edukasyon mantang pigdadagdagan an suporta sa serbisyo sa salud.
An Kamara nakatalaan na magsagibo nin deliberasyon asin pagboto kan propwestong budget sa ikatulo asin huring pagbasa sa Lunes, Oktubre 12, 2026; kun maaprobaran, an lakdang ipapadara sa Senado para sa sadiring proseso nin pag-aproba.
