LEGAZPI CITY- Epektibo na an Lifeline Subsidy Program o an pagpapaotob kan Energy Regulatory Commission (ERC) nin 100% na diskwento sa babayadan na kuryente sa irarom kan ERC Resolution No. 2, series of 2026.
Segun ki Albay Electric Cooperative Spokesperson Anj Galero na sa irarom kan nasabing resolusyon, natawan prayoridad an mga miyembro kan Pantawid Pamilyang Pilipino Program (4Ps) bako sana sa provincia kan Albay kundi sa iba pang parte kan nacion.
Igwang ipigdesignar na uniformed subsidy rate na 0 to 50 kilowatt-hours an konsumo nin kuryente kan nasabing mga benepisyaryo.
Alagad kun sa nagsunod na bulan na naglagpas sa threshold na 50 kilowatt-hours, dae na ini makakasabay sa mga makakaresibe kan libreng kuryente.
Napag-araman na sa bilog na provincia posibleng mabenipisyuhan kan programa an nasa 4,000 miyembro kan Pantawid Pamilyang Pilipino Progra.
Nilinaw man kan opisyal na bukas man sa iba pang mga miyembro kan vulnerable sector o mga nagtitios na pamilya an nasabing programa.
Sinabi ni Galero na kaipuhan sana magpasiring sa saindang opisina asin magpresentar nin application form, valid ID asin certification na magpapatunay na hibaba an kita.
Dagdag pa kan opisyal na dae man makaka apektar an nasabing programa sa serbisyo kan nasabing kooperatiba.
