Pigsugo kan Department of Energy (DOE) asin Energy Regulatory Commission (ERC) an National Grid Corporation of the Philippines (NGCP) na magsumiter nin report katakod kan magkakasunod na power supply disruptions sa Luzon asin Visayas kan mga nakalihis na aldaw.
Kasunod ini kan pagdeklarar kan NGCP nin yellow asin red alert status puon Mayo 12 hasta 14, na nagkawsa nin paramientras na pagkawara nin kuryente sa manlain lain na mga lugar na naka apektar sa milyones na mga consumers.
Segun ki Energy Secretary Sharon Garin, importante na matawan nin malinaw asin transparent na paliwanag an publiko dapit sa mga insidenteng nagkawsa nin kakulangan nin suplay kan kuryente.
Sa suway na pahayag, sinierto man kan NGCP na masunod ini sa kasuguan asin masumiter kan kinakaipuhan na report mantang nagpapadagos an imbestigasyon sa nagin problema sa grid system.
Segun sa NGCP na nakatutok ngunyan an saindang operasyon sa pagmamantenir kan katatagan kan Luzon asin Visayas grids mantang pighahalat an normalisasyon kan suplay nin kuryente.
Kaibanan sa mga pighahagad na detalye kan DOE hali sa NGCP an eksaktong oras asin hewas kan mga alert declaration, ugat kan problema sa grid, listahan kan mga planta asin transmission facilities na nagkaigwa nin forced outages o derating, reserve asin demand levels kan panahon kan insidente, asin an lakdang na ginibo ngani na maibalik sa normal an suplay kan kuryente.
