LEGAZPI CITY-Dae pighahale kan state weather bureau an posibilidad na liwat na magkusog pa an bagyong Champi antes tuluyang maglaog sa PH Area of Responsibility (PAR) ngonian na semana.
Segun kay Weather Specialist Charmagne Varilla, posibleng magipon liwat nin kusog an nasabing bagyo asin magbalik sa pagigin supertyphoon antes maglaog sa teritoryo kan nacion asin makaapektar sa hilagang-silangang baybayon.
Kun magtetenir an bagyo sa direksyon kaini asin an rikas kan paghiro, posibleng maglaog ini sa PAR saagang aga o sa hapon (Oktubre 20).
Posible man na magluwas na nin weather bulletin asin tuluyang magtaas nin storm signal an weather bureau poon ngonian na bangi o saagang aga huli sa mahiwas na sakop kan nasambitang bagyo.
Sa presente, pigtutumbok kan bagyo an Northern Luzon, orog na an teritoryong sakop kan probinsiya kan Batanes.
Huli sa epekto kan bagyo, posibleng magpaluwas naman saaga nin gale warning an weather bureau sa sirangang baybayon, bilang giya sa mga manlalayag asin mga parasisira.
Basado sa presenteng forecast, nagdadara nin makukusog na pag-uran asin parus an nasabing bagyo sa mga kadagatang sakop kaini, oras na makarani sa kadagaan kan nacion asin posibleng maeksperyensyhan na ini sa Northern Luzon poon saaga.
Sa presente an Intertropical Convergence Zone (ITCZ) asin localized thunderstorm an nagdadara nin mga serye kan pag-uran sa darakulang parte kan nacion.
