LEGAZPI CITY-Pig-octaba liwat kan Energy Regulatory Commission (ERC) an pagkolekta kan P0.0371 kada kilowatt-hour Green Energy Auction Allowance (GEA-All) na singil para sa mga billing month poon Setyembre sagkod Disyembre 2026.
An singil dati nang suspendido para sa Mayo asin Hunyo, asin pinalawig para sa Hulyo asin Agosto.
An Green Energy Auction Allowance, sarong regular na singil sa mga konsumidores na ginagamit sa pagpondo nin mga pagbayad sa mga developer nin renewable energy na nagpartisipar sa Green Energy Auction Program kan gobierno.
Segun sa ERC, an natatadang pondo kan GEA-All Fund hasta Agosto 5 sobra sa P556.9 milyon.
An pondong ini sinasabing supisyente na ngani masimbagan an pigkakarkulong bulanan na bayad sa mga kwalipikadong renewable energy developers maski ngani igwa pang tulong bagong planta na piglalaoman na mabali sa programa.
Katuyuhan kan suspensiyon na matabangan an mga pamilya na napapaatubang sa halangkaw na presyo kan mga barakalon asin iba pang gastos.
Pigsugo man kan ERC an mga distribution utilities, retail electricity suppliers asin an National Grid Corporation of the Philippines na siertuhon na warang GEA-All charges sa mga billing statement sa laog kan suspension period.
Mientrastanto, nagpatanid an ERC na an mga collection agents na dae magsunod sa nasabing orden posibleng isasangat sa show cause order asin iba pang penalidad.
