LEGAZPI CITY-Pigbubusol nina House Majority Leader Sandro Marcos asin Speaker Bojie Dy an propwestong House Bill No. 10430 o Systems Loss Charge Abolition Act.
Obheto kaini na haleon an system loss bilang separadong singil sa bulanan na bayadan sa kuryente.
Sa irarom kainil, dai na posibleng ipasa sa mga konsumidores an gastos na kawsa kan power theft, raot na metro, maluyang koleksyon, kakulangan sa maintenance, bako episyenteng operasyon asin iba pang kapabayaan kan distribution utilities.
Tutugutan sana an Energy Regulatory Commission (ERC) na aprubahan an pagbawi kan mga makatwiran asin kinakaipohan na gastos para sa maayos na serbisyo sa kuryente.
Ipapaotob man kan ahensya an reporma nin padiit-diit asin laomang makukumpleto sa laog nin tulong taon poon sa implementasyon kan mga regulasyon.
Ipigsugo man kan ahensya na magtakda nin minimum efficiency standards para sa mga distribution utility.
Enkaso maisabatas ini, ipapaluwas kan Energy Regulatory Commission an implementing rules sa laog nin 90 aldaw asin magigin epektibo ini, 15 aldaw makalihis na mailathala.
