LEGAZPI CITY – Arestado an pigkokonsiderang high value target makalihis na makuwaan nin mga kontrabando sa isinagibong buy-bust operation sa Barangay Quitago, Guinobatan, Albay.
Segun ki Philippine Drug Enforcement Agency (PDEA) Bicol spokesperson Carlo Fernandez sa intrevista kan Bombo Radyo Legazpi na binisto an suspetsado na si alyas “John”, 27 anyos, warang trabaho, asin residente kan Taguig City.
Nakuwa sa kagsadiri kan suspetsado an pigtutubudang shabu na may pigkakarkulong gabat na poco mas o menos 200 grams na may standard drug price na maabot sa P1,360,000.
Ini suboot an pinaka-enot na operasyon na isinagibo kan saindang ahensya na may napugo na dakulang kantidad nin kontrabando sa enterong nacion ngonian na 2026 kun kaya nagpapasalamat siya sa PDEA Albay Provincial Office, PDEA Regional Legal Unit, Guinobatan Municipal Police Station, asin sa Regional Police Drug Enforcement Unit 5 para sa pagtatarabangan nganing maisakatupadan an operasyon.
Pigtaram pa kan opisyal na basado sa saindang pa-enot na imbestigasyon, nagluluwas na pabalik-balik na sa rehiyon an suspetsado na nagdadara nin haralangkaw na kantidad kan ipinagbabawal na droga kun kaya pirang semana man na nagsagibo nin surveillance, imbestiga, asin validation an saindang ofisina nganing magtrayumpo sa pagdakop digdi.
Mahahampang an suspetsado sa kasong pagbayolar sa Republic Act No. 9165 o an Comprehensive Dangerous Drugs Act of 2002, mantang nagtetenir na ini sa kustodiya kan PDEA Bicol para sa magkakanigong disposisyon.
