LEGAZPI CITY-Nasalbar kan mga tawohan kan Philippine National Police (PNP) an labing 150 na mga foreign nationals hale sa pigtutubudang “parcel scam” operation sa laog kan sarong edificio sa Pasay City.
Nabuyagyag an operasyon makalihis na nakadulag an duwang Indonesian nationals asin naghagad nin tabang sa mga pulis.
Tulos na piglansar an sarong operasyon kan pulis, na kun saen nadiskubre kan mga otoridad an iba pang mga gamit, mga pekeng uniporme na pagsasadiri kan mga pwersa kan pulis kan Indonesia asin Malaysia.
Sinabi ni PNP chief Gen. Jose Melencio Nartatez Jr. na target kan grupo an sadiri nindang mga kababayan hale sa Indonesia asin Malaysia.
Kun saen igwang ipapadarang mga package asin tatakuton suboot na igwang laog na kontrabando enkaso maresibe ninda hasta sa tuluyang magtao nin kwata an mga target na biktima.
Dugang pa kan opisyal, kabale sa mga nangengenot sa operasyon an sarong Indonesian asin duwang Malaysian nationals.
Huli kaini, ipigsugo kan liderato na magsagibo nin mahiwasang imbestigasyon ngani maaraman kun igwa nin kasabwat an mga suspetsado.
An grupo nag-ooperar suboot sa lokasyon sa laog nin labing duwang bulan.
Sa ngonian, pig-aandam na kan PNP an pagsangat nin kaso kontra sa mga naarestar na suspetsado.
