LEGAZPI CITY-Kinumpirma kan Libon Municipal Police Station na naarestar an sarong 63-anyos na lalaki asin binistong Konsehal kan banwaan kan Oas, Albay makalihis na maimbuelto sa sarong hit-and-run.
Nagresulta ini sa pagkagadan kan sarong 13-anyos na estudyante asin tulong iba pa an nairido.
Nangyari an insidente bandang alas 4:20 nin pagka-hapon kan Oktubre 24, 2026 sa kahalabaan kan National Road, Purok Manga, Barangay Rawis, Libon, Albay.
Sa pangenot na imbestigasyon, nagkasalungat nin direksiyon an duwang behikulo—na sarong Suzuki GSX na motorsiklo na pigmamaneho kan 39-anyos na lalaki asin igwang lunad na sarong babae, na pasiring sa Barangay Maramba.
Mientras tanto, sarong puting Honda City naman an pigmamaneho kan suspetchado hale sa Barangay Maramba pasiring sa Pantao.
Digdi suboot nag-agaw nin linya an Honda City asin nakabangga sa motorsiklo na nagin rason kan pagtilapon kan driver asin lunad kaini sa sementadong kalsada.
Makalihis an insidente, napag-araman man na nagdulag an puting Honda City asin nakabangga nin duwang menor de edad na siklista, na nagresulta sa pagkagadan kan saro digdi.
Huli sa pangyayari, nagsasagibo na nin checkpoint an kapulisan sa lugar asin hot pursuit operations na nagresulta sa pagkakaaresto kan suspetchado.
Nasa kustodiya na suboot kan Libon MPS ang naarestong suspetchado asin padagos pa an imbestigasyon kan pulisya para sa bilog na detalye kan insidente.
