LEGAZPI CITY – Piglalaoman kan Gobierno Provincial kan Catanduanes na maibarewas antes magsapit an pasko an mga cash assistance gikan sa Department of Social Welfare and Development asin iba pang ahensya para sa mga pamilya na labing naapektaran kan nakaaging Bagyong Uwan.
Segun ki Governor Patrick Azanza sa intrevista kan Bombo Radyo Legazpi na ini an nagin promesa saiya ni DSWD Secretary Rex Gatchalian makalihis na aprubaran kan Department of Budget and Management an gagamiton na pondo.
Sa presente suboot an nagpapadagos na an pagbabarewas kan naunambitang asistensya sa mga apektadong pamilya kun sain 3 munisipalidad na an nakatapos na.
Kabale man sa plano kan saindang ofisina an pagdistribwer kan mga yero sa 4,665 na mga totally damage na kaharongan na gikan man sa Department of Human Settlements and Urban Development.
Mawot man kan opisyal na magpasa nin sarong executive order sa saindang provincia mapadapit sa pagtatao nin pabor kan ibang pulitiko sa saindang taga-suporta sa paglista kan dapat makakaresibi nin mga asistensya.
Pagdoon pa ni Azanza na marikas an nagin pagbabarewas nin tabang sa mga apektadong residente huli ta dae na kinaipuhan na halaton an siisay man na pulitiko nganing gamiton an pondo kan gobierno sa pagpapahamot kan saiyang pangaran.
