LEGAZPI CITY-Pigsierto ni Agriculture Secretary Francisco Tiu Laurel Jr., na mahigot na pigbabantayan kan gobierno nasyunal—partikularmente kan Department of Agriculture (DA)—an posibleng epekto kan huma kan El Niño sa nacion.
Sa katunayan, ipinaisi kan Kalihim na naghagad sinda nin total na P45-Bilyon sa Department of Budget and Management (DBM) para sa dedicated El Niño Response Program.
Kabale sa pondong ini an dati nang inaprobaran na P6.2-billion na United Program for Livelihood Improvement and Financial Transformation (UPLIFT), na nakatagama para sa pagdistribwir nin ayuda sa mga paraooma asin parasisira sa bilog na nacion.
Obheto kan ahensya na poonan an distribusyon kan fuel assistance sa mga parasira sa bilog na nacion ngonian na semana.
An programa obhetong tabangan an mga benepisyaryo na makaya an padagos na mga epekto kan krisis sa langis sa bilog na kinaban—partikularmente an paglangkaw kan presyo kan petrolyo—mantang kasabay na nag-aandam para sa nagdadangadang asin matinding huma kan Super El Niño.
Segun ki Secretary Laurel Jr., piggigibo na ngonian an opisyal na listahan kan mga paraooma na masunod na makakaresibe nin kaparehong ayuda.
Target kan departamento an bilog na distribusyon kan pondo sa mga paraooma na benepisyaryo antes matapos an bulan kan Oktubre.
