LEGAZPI CITY – Karsel an bagsak kan sarong lalaki makalihis na madakop sa isinagibong buy-bust operation kan mga otoridad sa Barangay Sta. Cruz, Virac, Catanduanes.
Segun ki Virac Municipal Police Station Chief of Police Police Major Kenneth Ding Gutierrez sa intrevista kan Bombo Radyo Legazpi na binisto an suspetsado na sarong 47-anyos, warang agom, warang trabaho asin residente kan naunambitang barangay.
Basado sa isinagibong operasyon an napag-aramang nadakop sa akto an suspetsado na nagpapabakal nin pigtutubudang shabu na kinumpirmar man kan isinagibong laboratory examination.
Narekober man suboot hale sa suspek an ilegal na kontrabando, buy-bust money asin iba pang non-drug items.
Pigtaram pa kan opisyal na an matrayumpong operasyon an naisakatupadan sa pagtatarabangan kan saindang hepatura, Catanduanes Provincial Intelligence Unit (PIU) asin Regional Police Drug Enforcement Unit 5.
Sa presente an nahahampang an suspetsado sa pagbayolar sa Republic Act 9165 o an Comprehensive Dangerous Drugs Act of 2002 asin nasa kustodiya na kan saindang ofisina para sa magkakanigong disposisyon.
Pangapodan ni Gutierrez sa saindang nasasakupan na dae magduwang isip na makipagtabangan sa saindang hepatura nganing dagos nang mapugo an presensya kan ilegal na droga sa saindang lugar asin nganing ma-ilikay an mga jovenes sa pagkaraot kan saindang buhay.
