Wara pang nareresibe an Philippine National Police kan pangenot na pagpapamati kan intensyon kan pagsurendir hali ki Senator Ronald Bato Dela Rosa.
Segun ki PNP spokesperson police Colonel Allen Rae na wara pa suboot na maski anong senyales kan pagsurendir an senador sa ibong kan sarong semana na palugit na itinao saiya kan mga otoridad.
Segun pa sa ahensya na ini an tsansa ngani na tapuson na ni Sen. Dela Rosa an pagtatago asin magsurendir na sana na igwang dignidad.
Nagdesignar na nin dugang na tracker teams an pamayuhan kan ahensya ngani na mahanap si Dela Rosa, alagad mas gugustuhon man liwat kan mga otoridad na magsurendir nin matanos an opisyal ngani na maibitaran an maski anong kariribukan.
Marurumduman na inanunsyar sa publiko na igwang P50 million na pabuya an makakatunton sa lokasyon ni Senator Dela Rosa.
Sa huring impormasyon man hali sa Department of Interior and Local Government (DILG), inihayag kaini na pigpo-protehiran si dela Rosa nin armadong grupo sa Mindanao.
Wanted ngunyan si Dela Rosa kan International Criminial Court katakod kan kasong crimes against humanity na may kinaaraman sa war on drugs ni dating Presidente Rodrigo Duterte.
Inakusaran an senador bilang co-perpetrator sa nasabing kaso.
