LEGAZPI CITY—Nagkundusir nin sarong aktibidad an kapulisan sa Catanduanes na may titulong ‘Turuparan’ 2026, kaiba an mga media practitioner sa isla provincia na ginibo sa Barangay San Vicente, Virac.
Segun ki Catanduanes Police Provincial Office Public Information Officer, Police Lieutenant Colonel Emsol Icawat, sa intrevista kan Bombo Radyo Legazpi, kamawotan ini kan saindang provincial magin kan regional director na siertohong may close coordination an mga media practitioner sa gabos nin hepatura kan kapulisan sa provincia.
Abiso ninda sa mga miembro kan media na en kaso makaeksperyensya nin huma sa buhay an tulos ining ipaaram sa kapulisan nganing matawan nin aksyon asin seguridad maski papano.
Mientrastanto, pigdoon kan opisyal na saindang pigbibisto an importansya asin mandato kan media sa saindang trabaho urog na pagpapaabot nin napapanahong impormasyon kaya dapat sanang tawan sinda nin seguridad sa anumang pinakamarikas na paagi.
