LEGAZPI CITY – Marikas na narespondehan kan mga otoridad an pagka-sulo kan signboard kan sarong edipisyo sa Barangay Sipi, Bato, Catanduanes.
Segun ki Bato Fire Station Senior Fire Officer 3 Mariano Marino Jr. sa intrevista kan Bombo Radyo Legazpi na tulos sindang nakapagresponde huli sa marikas na pakikipagkoordinar sa sainda kan mga concerned citizen mapadapit sa insidente.
Nagkataon suboot na harani sana an saindang ofisina sa pinangyarihan kan kasulo kun kaya dae man nahaloy an saindang mga personahes asin tulos na natumpos an kalayo.
Basado man sa saindang pa-enot na imbestigasyon, nagluluwas na short-circuit an nagin rason kan kasulo huli ta posibleng nagkaigwa nin lamat an mga wire huli sa uran asin paros na kawsa man kan mga nakaaging raot nin panahon na naka-apektar sa saindang provincia.
Pigtaram pa kan opisyal na wara man na ibang parte kan edipisyo an nadanyaran kan nagbungkaras na kasulo mantang suspetya niya man na dae na-inspeksyon an mga nasulong wire makalihis an mga nangyaring pag-uuran huli sa langkaw kan signboard.
Sa kagayunan suboot na may concerned citizen na nakahiling kan insidente asin marikas na nagkoordinar sa saindang ofisina kun kaya uminabot sana sa poco mas o menos P5,000 an kabilugang danyos.
Abiso man ni Marino sa saindang mga residentes na permihang i-check an saindang mga electrical connections urog na ngonian na “Ber” months kun sain kalimitan an pagbubugtak nin mga christmas lights sa luwas kan saindang mga kaharongan.
