LEGAZPI CITY-Ipigpaliwanag ni Rev. Fr. Gregory Ramon D. Gaston, rector kan Pontificio Collegio Filippino, an importansya kan pagkaka-elihir ni Filipino Cardinal Luis Antonio Tagle bilang bagong Dean kan College of Cardinals.
Segun sa saiyang pahayag, sarong dakulang onra asin grasya ini para sa Pilipinas asin sa bilog na Asya.
Si Cardinal Tagle an nagsalida sa puwesto ni Cardinal Giovanni Battista Re na 92 anyos na, makalihis aprobaran ni Pope Leo XIV an pagkaka-elihir saiya kan mga cardinal-bishop.
Nagin makasaysayan an pagpili ki Tagle, 69 anyos, huli ta siya an pinakaenot na Pilipino asin Asyano na nagkapot kan nasabing pwesto.
Bilang dean, responsabilidad ni Cardinal Tagle na giyahan asin magkoordinar sa mga kapwa cardinal.
An dekano igwa man nin importanteng papel kun an tukawan kan Santo Papa nagigin bakante, partikularmente sa pagtiripon kan mga Cardinal asin sa mga preparasyon para sa conclave, o proseso nin pagpili nin bagong Santo Papa.
Sa pagpili kan Dekano, an mga cardinal na kaiba sa Order of Cardinal Bishops an naghahalal nin kandidato gikan sa grupo ninda, asin an resulta pigsusumiter sa Santo Papa para sa pag-apruba.
Sa paghiling ni Fr. Gaston, posibleng kaiba sa mga konsiderasyon sa pagkaka-elihir ni Cardinal Tagle an saiyang edad asin halawig na eksperyensya sa Simbahan, kabale an saiyang pagserbi bilang Obispo kan Imus asin Arsobispo kan Maynila, antes magkaigwa nin responsIbilidad sa Vatican.
Pig duon pa ni Fr. Gaston na an bagong papel ni Cardinal Tagle bako na sana para sa Pilipinas, kundi para sa mas mahiwas na Simbahan sa bilog na kinaban.
An onra para sa mga Pilipino, segun saiya, bako huli sa pagmidbid kan saiyang pangaran, kundi huli sa oportunidad na magserbi sa Simbahan sa internasyonal na lebel.
