LEGAZPI CITY-Ipigheras ni Dr. Rodney Boncajes, Medical Specialist IV asin psychiatrist kan National Center for Mental Health, an manlaen-laen na paagi nin pag-ataman sa mga kondisyon sa mental health, bilang paggiromdom sa World Mental Health Day kasohapon, Oktubre 10.
Segun saiya, may manlaen-laen na klase nin clinical management na pwedesir gamiton depende sa kondisyon asin pangangaipo kan pasyente.
Kaiba digdi an pagtao nin angay na medisina o psychopharmacology para sa mga kondisyon arog kan anxiety, insomnia, asin attention-deficit/hyperactivity disorder o ADHD.
Kaiba man sa mga paagi nin pag-ataman an psychotherapy, na may mga porma arog kan cognitive behavioral therapy, interpersonal therapy, asin family therapy.
Ipigpaliwanag man an psychiatric rehabilitation, na may katuyuhan na makatabang sa mga pasyente na mapaorog an saindang kakayahan sa pagtrabaho, social skills, asin pakikipag-interaksyon sa pamilya asin komunidad.
Mientrastanto, sinabi man na importante an pakikipagkoordinar sa ibang medical specialists kun may kaiba pang kondisyon sa lawas an pasyente, arog kan hypertension asin diabetes.
Manongod sa levels of care, ipigpaliwanag man an tulo na porma nin pag-ataman sa mga pasyente: inpatient admission, o pag-admit sa ospital; partial hospitalization o day-treatment programs na dae kaipuhan magpa-admit; asin residential care na isinasagibo sa pasilidad na dai kapareho kan tradisyonal na hospital setting.
An mga paaging ini nagpapahiling na an pag-ataman sa mental health dai limitado sa pag-inom sana nin medisina, kundi kaiba man an therapy, rehabilitation, asin angay na level of care basado sa pangangaipo kan pasyente.
