LEGAZPI CITY-Nakapag-rehistro nin 56.7 degrees Celsius na temperatura sa Death Valley sa California, United States.
Poon kan Hulyo 10, 1913, midbid ini komo igwang pinakahalangkaw na nairehistrong temperatura sa kinaban.
An Death Valley, na parte kan Death Valley National Park, sarong disyerto na bantog sa grabeng init, hababang lokasyon asin diit sana na pag-uran.
Segun sa National Park Service, nasa ibaba ini kan sea level asin napapalibutan nin halangkaw na kabuludan.
Huli digdi, an mainit na paros na nag-iikot sa lambak asin nagdudugang pa an init.
An temperatura sa panahon nin tag-init pirmeng nag-aabot o naglalampas sa 49 degrees Celsius, mantang diit sana an uran na nag-aabot sa lugar.
Sa ibong kan klima, may mga tawo pa man na nag-iistar asin nagtatrabaho sa lugar, kaiba an mga empleyado kan parke asin mga residente sa mga komunidad sa palibot.
Bilang pag-atubang sa matinding init, pirmihan sindang nag-iinom nin dakol na tubig tanganing malikayan an dehydration, naggagamit nin air conditioning kun may akses digdi, asin nagpa-plano nin mga aktibidad sa mas amay na oras sa aga o sa banggi kun mas hababa na an temperatura.
An grabeng init sa Death Valley nagdadara nin peligro sa mga turista, kaya inaabisuhan kan mga awtoridad na mag-andam asin likayan an mga aktibidad sa hababang parte kan nasabing parke sa panahon nin tag-init.
