LEGAZPI CITY-Natapos na an epekto kan Southwest Monsoon o “Habagat” sa nacion, alagad laoman suboot an epekto kan “Hanging Amihan” o an Northeast Monsoon sa huring aldaw kan Oktubre hasta sa enot na semana kan Nobyembre.
Segun kay Masbate Chief Meteorological Officer Riza Bartolata, sa intrevista kan Bombo Radyo Legazpi na bago magpoon an “Hanging Amihan” an madadanasan muna an sarong transition kun sain laoman an epekto kan easterlis o an paros hale sa sirangan na magdadara nin maalinsangan na panahon asin mga thunderstorm.
Piglinaw man kan state weather bureau na liwat sa pagtatapos kan epekto kan southwest monsoon sa nacion, an dai ibig sabihon na mapoon na an amihan season kun sain ma-shift sa malipot na paros an kadalasan na maeeksperyensyahan hasta pebrero asin enot na aldaw kan Marso.
Magigin halawig suboot an epekto kan “Hanging Amihan” ngonian na taon asin magdadara ini nin mga paguuran orog na sa parte kan Kabikolan, Samar, Leyte, asin sa eastern portion kan Luzon.
Laoman man suboot an pagagi kan mga bagyo sa kadagaan enkaso mamatian na an epekto kan “Hanging Amihan” sa nacion na kadalasan na nagtatama sa Bicol Region, Visayas, North Eastern Mindanao poon Oktubre hasta sa Disyembre.
Mas kadakol suboot an track kan bagyo tuyong amihan season asin laoman man an epekto kan shearline o Low Pressure Area (LPA).
Dugang pa kan opisyal na nasa maximum na 7 bagyo pa an laoman hasta matapos an bulan nin Disyembre.
Abiso man kan opisyal na magin handa bako sana an gobierno sa posibleng peligro na dara kan mga kalamidad tuyong amihan season.
