LEGAZPI CITY-Ipighayag kan State Weather Bureau na posibleng magtapos na sa mga masunod na aldaw an Habagat season o an epekto kan southwest monsoon, mantang mamamatean naman an Amihan season o an northeast monsoon bilang transition period kaini.
Segun ki Catanduanes Weather Specialist Jun Pantino, sa intrevista kan Bombo Radyo Legazpi na sa ngonian nakakamate man liwat nin mga localized thunderstorms asin trough kan LPA sa parte kan Kabikolan, kaya igwang paminsan-minsan na mga pag-uuran.
Sinabi kaini na posibleng matapos na an epekto kan Habagat season asin magkaigwa na nin transition sa Amihan season sa mga masunod na aldaw.
Enkaso maglaog na ini sa nacion, magigin mauran suboot sa Eastern Side kan Bicol Region partikular na sa Catanduanes.
Mientras tanto, afuera kaini, pinagbabantayan man an paglaog kan epekto kan Super El Niño phenomenon kun sain pinaglalaoman sa bulan kan Oktubre, Nobyembre, Disyembre, sagkod sa enot na kwarter kan taong 2027.
Sinabi kan opisyal na may mga pag-uran huli ta pigdadara man kan hanging amihan an mga panganuron sa rehiyon.
Posible man suboot maeksperyensyahan sa mga panahon na ini an tuluyang pagdiit sa suplay nin tubig.
Sa katunayan, sa parte kan Masbate, nagkakaigwa na nin paghubas sa mga pinakukuanan nin tubig.
Inaabisuhan man kan opisyal an publiko na mantang wara pang epekto an pig-aapod na Super El Niño, magbakal na nin tipunan nin tubig o kaya naman maghanap na nin iba pang alternatibong sources kan suplay nin tubig sa saindang mga lugar.
