LEGAZPI CITY—Nakumpiskar an labi P374,000 na kantidad nin pigtutubudang shabu sa sarong High-Value Individual sa ikinundusir na buy-bust operation kan mga otoridad sa Barangay Poblacion, Cawayan, Masbate.
Binisto an suspek na si alyas “Hazel,” 36-anyos, dating Overseas Filipino Worker (OFW) asin residente kan nasambitang lugar.
Nakatakas man an saro pa kaining kaiba na si alyas “Tintin.”
Nakumpiskar gikan ki alyas “Hazel” an pocomas o menos 55 gramos nin pigtutubudang shabu na may kantidad na P374,000, siring man an marked money asin iba pang drug paraphernalia.
Pinangenotan an operasyon kan Philippine Drug Enforcement Agency Masbate, Cawayan Municipal Police Station, Provincial Intelligence Unit, asin Regional Mobile Force Battalion 5.
Mientrastanto, nasa kustodiya na kan Cawayan MPS an suspek asin mga ebidensya para sa magkakanigong disposisyon asin mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
Mantang padagos man an paghahanap kan mga otoridad laban sa nakatakas na suspek.
