LEGAZPI CITY-Mas pinahigot kan Philippine Drug Enforcement Agency (PDEA) Bicol an saindang kampanya kontra sa ilegal na droga, orog na ngonian na nagpoon na an “ber” months.
Segun ki PDEA Bicol Spokesperson Carlo Fernandez III, sa intrevista kan Bombo Radyo Legazpi, na nagkapirang lugar sa ciudad, orog na sa barangay Victory Village asin iba pang kataid na barangay an igwang mga sekretong iligal na aktibidades, na sa kagabsan, naikokonektar sa ilegal na droga.
Huli sa nakalihis na pagkakadakop sa mga suspek, proweba suboot ini na nakakayang laogon kan mga otoridad an mga “very notorious” na mga lugar na ini.
Nagigin epektibo man suboot an saindang mga lakdang ngani magkadarakop an mga ini.
Nagpatanid man si Fernandez, na dakula an pigpapataw na padusa sa mga madadakop, kun sain habangbuhay na pagkakakulong ini asin pigtatawan nin iba pang mga penalidad.
Mientras tanto, mas pinahigot man ninda an seguridad sa Matnog Port, huli ta ini an pinaka-busy na lugar, orog na ngonian na “ber” months.
Padagos man nindang babantayan an mga naglalaog asin nagluluwas sa nasabing provincia.
