Kinumpirmar kan Philippine Air Force (PAF) an pagbagsak kan duwa sa saindang SF-260 basic trainer aircraft makalihis magsalpukan sa ere mantang nagsasagibo nin training flight sa Fernando Air Base sa Lipa City, Batangas.
Nangyari an insidente bandang alas-3:51 nin pagkahapon kasuudma.
Basado sa pangenot na impormasyon hali sa mga lokal na otoridad, binawian nin buhay an apat na piloto na lunad kan duwang eroplano, alagad nagpapadagos pa an berepikasyon asin wara pang pahayag an nasabing ahensya dapit sa saindang sitwasyon.
Makalihis an insidente, tulos man na nag-deploy nin response team an PAF ngani na i-secure an lugar kan aksidente asin punuunan an imbestigasyon.
Sinierto man suboot an sitwasyon kan saindang mga tauhan asin kan mga residente na harani sa lugar.
An mga imbweltong aircraft an pinagtutubidan na huring bersyon kan SF-260FH na nabakal sa irarom kan administrasyong Arroyo asin nai-deliver puon kan administrasyong Aquino.
Nagtetenir man na nakatutok an pamayuhan kan Philippine Air Force sa masusing imbestigasyon mantang pigtatawan prayoridad an seguridad asin kapakanan kan mga naapektaran kan nasabing trahedya.
