LEGAZPI CITY—Takdag sa kamot kan mga otoridad an saro sa pigkonsiderar na Regional Most Wanted Person kan Bicol na saro man na miyembro kan communist terrorist group sa Barangay Pasong Langka, Silang, Cavite.
An nasambitang high-value target listed an naarestar sa pinagsarong operatiba kan Technical Support Division kan PNP Intelligence Group; San Fernando Municipal Police Station kan Masbate Police Provincial Office; Regional Intelligence Division – Regional Special Operations Unit 5 asin Silang MPS kan Cavite Police Provincial Office.
Sinerbehan an suspek nin mandamiento de aresto sa kasong murder na inisyu kan Nobyembre 18, 2024.
Binisto an suspek na si alias “Jun,” 59-anyos, asin residente kan Barangay Progreso, San Fernando, Masbate.
An suspek pigtutubudang kaanib sa Komiteng Probinsya 4 (KP4) sa irarom kan Bicol Regional Party Committee, asin natatakod man sa grupong pinamamayuhan ni Eliseo Cabarles o pigbistong si “Ka Kiko”, na sarong bistong persona sa laog kan communist terrorist movement.
Sa presente nasa kustodiya na ini kan Silang Municipal Police Station para sa magkakanigong disposisyon.
