LEGAZPI CITY—Arestado an sarong lalaki na drayber suboot kan sarong kandidato sa pagka-Sangguniang Bayan makalihis na makumpiskar digdi an duwang kalibre nin badil sa kinundusir na Comelec checkpoint sa Brgy. Poblacion 1 sa banwaan kan Claveria, Masbate.
Segun ki Masbate Police Provincial Office Claveria Municipal Police Station Officer In-Charge Police Captain Ma. Dolores Abenia, sa intrevista kan Bombo Radyo Legazpi, binisto an suspetsado na si Alyas “Berto,” 31-anyos, sarong lending collector asin residente kan Sitio Rawis, Brgy. Nonos kan nasambitang banwaan.
Nakumpiskar sa suspetsado an sarong caliber .38 revolver na may limang bala asin warang serial number; asin caliber .45 pistol na may anom na bala asin may serial number na 739462.
Sinabi pa ni Abenia na durante kan checkpoint, backrider an kandidato sa pagka-Sangguniang Bayan kan Claveria, alagad dae kaini aram kun nata may dara an saiyang drayber nin mga armas.
Sa kinundusir na checkpoint wara man na maipahiling na magkakanigong dokumento an suspetsado.
Nasa kustodiya na kan Claveria MPS an suspetsado asin posibleng mahampang sa kasong pagbalgar sa Republic Act 10591 o Comprehensive Firearms and Ammunition Regulation Act asin Comelec Resolution No. 11067 na nagbabawal sa pagdara nin armas sa panahon kan eleksyon.
