LEGAZPI CITY-Nakatalaang magsagibo nin public hearing an Senate Committee on Finance kaiba an mga kinatawan ng civil society organizations (CSOs) sa Lunes, Oktubre 26, ngani repasuhon an mga posibleng reporma sa proseso kan pagba-budget para sa 2027 national budget.
Piglalaomang magseserbing pagkakataon ini ngani maisangat kan mga CSO an saindang pagbusisi asin rekomendasyon katakod kan propwestong budget, kaiba an mga lakdang ngani mapakusog an transparency, accountability asin pakikisumaro kan publiko sa proseso kan pagbabadyet.
Susog sa propwestong sistema kan Senado, importanteng matawanan an publiko nin access sa mga dokumento asin impormasyon mapadait sa mga alokasyon ngani masubaybayan kun pano pinag-oolayan asin pinagde-desisyunan an paggamit kan pondo kan gobierno.
Kaiba sa mga isyung piglalaoman na matawan nin pansin, an mga kuwestiyonableng alokasyon asin pangangaipohan na masierto na igwang malinaw na basehan, lokasyon, asin paggagamitan an mga proyektong popondohan kan gobierno.
Naenot nang sinabi ni Senate Committee on Accounts Chairperson Sen. Panfilo “Ping” Lacson na piglalaoman kan Senado an mga suhestyun kan mga CSO sa pagpapaotob kan mga reporma sa budget.
Kaiba sa mga isyung isinangat kan mga grupo an sarong farm-to-market road project na nagkakantidad nin P55 milyon na nakatalaan suboot sa Quezon province, alagad an nakatalang coordinates sinasabing nagtutukdo sa katubigan harani sa Brunei.
An nasabing alegasyon nangangaipohan pa man liwat nin beripikasyon hale sa mga kaukulang dokumento asin ahensiya.
An pagdangog parte kan mas mahewas na pagbusisi kan Senado sa 2027 national budget, sa tahaw kan mga pangapudan para sa mas mahigot na pagbabantay sa mga alokasyon asin pagsunod sa mga pamantayang itinalaan kan Konstitusyon.
