LEGAZPI CITY-Inaprobaran na kan Senado an ley na naglilimitar sa paggamit kan mga menor de edad kan social media.
An Senate Bill No. 2424, o an Safe Media Access and Responsible Technology for Kids in Digital Spaces (SMART KIDS) bill—na pigpropwesto ni Senador Robin Padilla—naipasar na sa ikatulo asin huring pagbasa.
An bill nakakua nin 16-1 na boto; ini nagmamando kan implementasyon kan mga sistema nin pagsierto sa edad asin an restriksyon o paghale kan mga account na pagsasadiri kan mga menor de edad na pigtutubodan na ‘high risks’ na maimpluwensiyahan kan mga online games arog kan Roblox asin Gorebox.
Si Senador Risa Hontiveros sana an solamenteng nagkontra sa nasabing ley, na pigtatawan nin duon an importansya kan social media sa pang-aroaldaw na buhay kan mga kaakian.
Nagsambit siya nin mga halimbawa arog kan mga 17-anyos na nagtatrabahong mga estudyante na naggagamit nin social media para sa online selling, siring man an mga kaakian na may mga magurang na nagtatrabaho sa ibang nacion na nagsasarig sa social media nganing makipag-olay.
Nakalaag sa bill na an mga digital platforms na dae nagsusunod mahahampang sa multa na maabot sa P5 milyon hasta P20 milyon kada pagbalgar, afuera pa sa aroaldaw na multa na P100,000 sa dae pagsunod.
Tinawan nin duon kan Senate President na si Sherwin Gatchalian an kahulugan kan ley, na sinasabi na ini an pwedisir magin solusyon nganing mapundo na an mga pig-aapod na online groomers.
Mientrastanto, pigladawan ini kan Senate Majority Leader Juan Miguel Zubiri bilang sarong “landmark” bill na kinakaipuhan kan nacion nganing magiyahan asin ma-regulate an paggamit kan social media kan mga jovenes.
