LEGAZPI CITY-Aminado si Senate President Win Gatchalian na nagin magabat an trabaho sa senado huli sa nagpapadagos na impeachment trial laban kay Bise Presidente Sara Duterte asin sa maabot na diskusyon sa propuestong national budget para sa taong 2027.
Segun ki Gatchalian, dakulang angat para sa Senado na sabay-sabay na asikasohon an impeachment trial, deliberasyon kan national budget, labi sa 50 bills na nagtetenir sa Legislative-Executive Development Advisory Council (LEDAC), asin iba pang prayoridad na isinangat kan mga senador.
Sinabi niya na preparado an mga senador na magtao nin dagdag na panahon ngani mapaotob an gabos nindang trabaho. Kabale sa mga pig-aadalan na lakdang, iyo an paggibo nin hearing asin technical working group meetings kada Huwebes, Biyernes, sagkod Sabado.
Segun pa ki Gatchalian, nagtatagama nin maabot sa apat hasta sa anom na oras kada aldaw an senado para sa impeachment trial.
Huli ta an testimonya kan nagkapirang testigo, mas halawig kaysa sa piglalaoman, kun sain sinabi niya na an total na posibleng uminabot sa 14 sagkod 16 na bulan.
Mientrastanto, pig-aadalan man kan Senado an mga posibleng pagbabago sa schedule kan impeachment proceedings ngani na maparikas an pagdangog kan kaso, maibitaran an duplication kan mga testigo, asin matawan nin lugar an sabay-sabay na pag-orolay kan mga importanteng bills asin an 2027 national budget.
