LEGAZPI CITY-Nagsangat si Senator Risa Hontiveros nin propwesting magtatao sa Presidente nin kapangyarihang magpaotob nin price cap sa singil sa kuryente sa panahon kan state of emergency o kalamidad ngani maprotehiran an mga konsyumer laban sa biglaang pagtaas kan electricity rates.
Sa irarom kan Senate Bill No. 2361, na obhetong amyendahan an Electric Power Industry Reform Act o EPIRA, posibleng magtakda an Presidente nin mandatory price ceiling sa presyo kan kuryente bilang tugon sa mga panluwas na salik na nagbubusol sa paglangkaw sa singil sa panahon kan krisis.
Segun kay Hontiveros, dai dapat mawaran nin kontrol sa paglangkaw kan singil sa kuryente orog na padagos na nadidifisilan an mga Pilipino sa halangkaw na presyo kan pagkaon, transportasyon, bulong asin iba pang pangenot na pangangaipo.
Afuera sa price cap, nakalaag man sa propwesto an 90 aldaw na moratorium sa pagputol kan suplay nin kuryente asin pagtatao nin deferred payment schemes para sa mga residential consumer asin micro, small and medium enterprises (MSMEs) sa panahon kan emerhensiya.
