LEGAZPI CITY-Piglalaomang matatapod kan Senado an parte kan impeachment case mapadapit sa suboot grave threats ni Vice President Sara Duterte bago matapos an Hulyo.
Segun kay Senate impeachment court spokesperson Atty. Reginald Tongol, nagkaskas an proseso matapos bawion kan prosekusyon an paghampang sa anom pang testigo para sa Article 4 kan impeachment complaint.
Huli digdi, piglalaomang ililipat na an paglilitis sa masunod na alegasyon, an suboot maling paggamiy kan confidential funds kan Office of the Vice President (OVP) asin Department of Education (DepEd).
Sa Article 1 kan impeachment complaint, inaakusaran si VP Sara kan suboot pagbayolar sa public trust asin graft and corruption huli sa sinasabing maling paggamit asin pag-liquidate kan kabilugang P500 million na confidential funds kan OVP asin P112.5 million hale sa DepEd.
Pighahanda na kan prosekusyon an pagpapaapod sa tulong testigo para sa isyung ini.
Kaiba digdi sinda Marivic Pareja kan Legislative Archive Museum kan House of Representatives; Violeta Constantino, dating manager kan Landbank Shaw Boulevard branch; asin Leonita Camposano, dating manager kan Landbank DepEd branch.
Segun kay Senate President asin presiding officer Chiz Escudero, tatapuson muna kan prosekusyon an saindang presentasyon sa gabos na article kan impeachment bago magpoon an depensa sa saindang mga ebidensya.
