Ipigdoon ni House Prosecution Member asin Representante Terry Ridon na wara nang puwang an kampo kan depensa na gumamit nin anuman na delaying tactic manungod sa impeachment trial ni Vice President Sara Duterte.
Segun saiya, pormal na deadline an iskedyul na iniluwas kan Impeachment Court kaya kaipuhan pagkasyahon kan defense team an saindang oras sa pagpresentar nin ebidensya tanganing pabulaanan an mga inilatag kan prosekusyon.
Enot nang iniluwas kan korte an iskedyul kan mga pagdangog para sa bilog na bulan paagi sa advisory na may petsang Oktubre 13.
Basado sa opisyal na dokumento kan Impeachment Court, nagsumite na an kampo kan depensa nin listahan nin 25 testigo na boot nindang ihampang sa paglilitis, alagad nag-atras na sa pagigin enot na testigo an political asin constitutional law professor na si Ralph Sarmiento.
Antes ini, ipinahayag ni House Deputy Speaker asin Iloilo First District Representante Janette Garin an saiyang pagtubod na gumagamit an kampo ni Duterte nin “3D tactic” o “Delay, Delay and Divert” strategy sa kaso.
Piglalaoman na maiibitaran an arog kaining mga estratehiya tanganing dai mapugulan an Impeachment Court sa pagpaluwas nin patas asin napapanahon na desisyon.
