LEGAZPI CITY—Matrayumpong narespondehan kan mga otoridad an mga residente asin motorista apektado nin pagbaha sa Sitio Imbudo, Brgy. Jamorawon, Milagros, Masbate kawsa kan mga pag-uuran kan nakalihis na aldaw.
Segun ki Masbate 1st Provincial Mobile Force Company, Revitalized-Pulis sa Barangay Jamorawon Team Leader, Police Staff Sergeant Jose Batz Pacheco, sa intrevista kan Bombo Radyo Legazpi, kasunod kan mga nahiling nindang post sa social media kun sain nag-apaw na an tubig sa tulay kan nasabing barangay an tulos man sindang nagresponde sa mga estudyante, mga nag-aaging residente asin mga motorista sa lugar.
Segun saiya na ini an solamenteng agihan kan mga residentes maski pa nag-uuran huli sa an ibang agihan sa lugar an pigbahaha man asin harayo na an lokasyon.
Dugang ni Pacheco na an tulay an concern kan barangay kaya makikipagkoordinar sinda sa Department of Public Works and Highways asin lokal na gobierno nganing maresolbaran ini.
Mientrastanto, pangapudan kan opisyal sa mga nag-aagi sa nasabing tulay na mag-iingat asin dae na magpirit na mag-agi kun labi na an pagbaha. Pig-asigurar man niya na preparado sindang magtaong asistensya en kaso man na may kinakopuhan na tabang.
