LEGAZPI CITY—Dae piglalaoman ni Angela Mae Mascariñas, gikan sa provincia kan Masbate asin estudyante kan Ago Medical and Educational Center–Bicol Christian College of Medicine, na saro siya sa magigin topnotcher sa isinagibong April 2025 Licensure Exam for Midwives.
Segun ki Angela Mascariñas, an top 5 sa April 2025 Midwifery Licensure Examination, sa intrevista kan Bombo Radyo Legazpi, dae niya paglalaoman na makaiba sa topnotchers, nin huli ta pighihiling niya na dakol na sala an saiyang naisimbag sa eksaminasyon.
Sinabi pa kaini na durante kan saindang pre-board exam, saro siya sa mga nakakaiba sa top, alagad, segun saiya, na sa board exam yaon na mismo an pagdududa huli ta dae aram kun ano magigin mga kahaputan digdi.
Dugang niya na na pigre-review na sinda kan saindang eskwelahan bako pa man makagradwar.
Saro man saiyang nagin inspirasyon iyo an saiyang pamilya.
Sa presente, mawot ni Mascariñas na magkua nin medisina huli ta saro man ini sa saiyang mga pangiturugan.
Mensahe kaini sa mga nagmamawot man na magkua nin midwifery na dapat nindang i-manifest ini, tawan nin esfoerso asin pagpangadyi.
Sinabi pa niya na dae dapat ipagkumparar an sadiri sa iba nin huli ta may kaniya-kaniya man na timeline an lambang saro.
