Naghahanda an sarong opisyal kan Pilipinas na makipag-olay sa trade representative kan Estados Unidos nganing tukaron an mga ipigbugtak na taripa ni US President Donald Trump.
Segun kay Undersecretary Ceferino Rodolfo kan Department of Trade and Industry (DTI), posibleng dae maapektaran an Pilipinas kan mga kadugangang taripa huli sa balanseng kalakalan kaini sa US.
Sa datos kan Philippine Statistics Authority kan 2023, may $4 billion na trade deficit an Pilipinas sa US na mas sadit kumpara sa ibang nacion sa Asia arug kan China na may $300 billion.
Huli digdi, nagtutubod si Rodolfo na nasa magayon na posisyon an Pilipinas nganing ibusol an mas matibay na economic relation sa US.
Presenteng nagtatabangan sinda DTI Secretary Cristina Roque asin Special Assistant to the President for Investment and Economic Affairs Secretary Frederick Go nganing mapakusog an relasyon sa ekonomiya kan duwang nacion bago pa man magtukaw si Trump sa saiyang posisyon.
