Nangapodan an House of Representatives sa mga ahensya kan gobyerno na masiguro na madistribwer nin tama an P6.2 bilyones na tabang para sa mga paraoma asin parasira na apektado kan El Niño asin matinding tagmara.
Sa pagdangog kan House Committee on Agriculture and Food, pinangenotan ni Quezon Rep. Mark Enverga an pagsusuri kun nakakaabot man nanggad an ayuda para sa labing 310,000 na saradit na paraoma asin parasira, kabali na an tabang sa gasolina, abono, asin pankabuhayan.
Pig-eeksaminar man kan komite an kakulangan na P371 milyon para sa mga importanteng programa arog kan cloud seeding asin pagkontrol sa mga peste sa mga tanuman nin tubo, na dakulang nakakaapekto sa produksyon.
Kabali man sa pig-aadalan an pigsuhestyon na P61.99 bilyones na plano kan Department of Agriculture na nakatutok sa pagsigurar kan seguridad sa pagkakan sa tahaw kan kalamidad.
Segun ki Sultan Kudarat Rep. Bella Vanessa Suansing, kaipuhan na pakusugon an paggamit nin mga pananom na matibay sa tagmara asin magtao nin alternatibong pagkukuanan nin ganasya sa mga paraoma asin parasira tanganing dai sinda mawaran nin kabuhayan.
Dagdag pa kan mga mambabatas, dapat man pag-andaman an epekto kan El Niño bako sana sa agrikultura kundi pati sa suplay nin tubig, enerhiya, salud, asin kabuhayan kan mga komunidad.
Tinawan-doon kan Kamara na dai dapat maatraso an tabang huli ta padagos na namemeligro an kabuhayan asin produksyon nin pagkakan sa nasyon, kaya hinagad ninda sa mga ahensya an malinaw na report, marahay na koordinasyon, asin tulos na aksyon tanganing maprotektaran an sektor kan agrikultura.
