Nagpaluwas nin kasuguan an Sandiganbayan para sa 90 diaz na preventive suspension laban ki Leyte 1st District Representative Ferdinand Martin Romualdez, manungod sa mga nakapending na kaso laban sa saiya sa anti-graft court.
Segun sa resolusyon na pinaluwas kan korte, an preventive suspension sarong standard na lakdang sa irarom kan Republic Act No. 3019 o Section 13 kan Anti-Graft and Corrupt Practices Act.
Piglinaw kan Sandiganbayan na an suspension bako ining padusa o pinal na hatol sa kaso, kundi sarong probisyon kan ley tanganing masiguro na dai magagamit nin siisay man na opisyal an saiyang posisyon mantang nagpapadagos an pagdangog.
Sa irarom kan nasabing kasuguan, paramientas na mapupundo an pagtupad ni Romualdez sa saiyang mga tungkulin bilang representante kan Leyte asin iba pang opisyal na trabaho na konektado sa saiyang opisina sa House of Representatives sa laog nin tulong bulan.
Ipinadara na kan Sandiganbayan an kopya kan orden sa Kamara de Representantes tanganing tulos na maipatupad an preventive suspension.
Mientrastanto, ipighayag kan kampo kan mambabatas na pigagalang ninda an proseso kan ley alagad nakatakda sindang magsangat nin mga nararapat na legal na lakdang o motion for reconsideration manungod sa nasabing direktiba kan korte.
