LEGAZPI CITY — Irido an walong katawo sa nangyaring pagbangga kan 6-wheeler truck sa sarong ambulansya asin pampasaherong tricycle sa Barangay Basud, ciudad kan Sorsogon.
Sa intrevista kan Bombo Radyo Legazpi ki Pol. Supt. Jefferson Araojo, hepe kan Sorsogon City Police, pasiring kuta sa Legazpi City an ambulansya kan Sorsogon MMG Hospital tangarig ilipat an lunad na pasyente kan mangyari an aksidente.
Huli sa paghihidali, nag-overtake ini sa sarong kotse pawala alagad dae nanotaran an kasabatan na truck na karga man an mga gamit sa harong na pasiring sa Metro Manila.
Huli digdi, nagsabit sa hawak kan truck an walang parte kan ambulansya na nagresulta sa pagkakawasak kan atop kaini.
Binalo pa kan truck na maglikay patuo alagad nagsabit man ini sa tricycle na nagresulta sa pagkakabangga kan truck sa may hudyan na parte kan ambulansya.
Tulos man na nagresponde an sarong ambulansya asin ibinalik sa ospital an pasyente kaibanan an agom asin duwang aki, magin an private nurse asin aki kaini siring man an driver.
Maswerte man na dae nagsapar nin anumang lugad an tricycle driver asin tulong pasahero.
Segun ki Araojo, nasa kustodiya na ngonian kan hepatura an truck driver tangarig imbestigaran mantang kukuwaan man nin pahayag an mga biktima oras na magin maray na an kamugtakan kan mga ini.
Mientras tanto, nagpagirumdom man an hepe na mag-ingat sa pagmamaneho huli ta posibleng karibay kan sarong aksidente an buhay kan tawo.
