LEGAZPI CITY-Suminikat na sa 21 an numero kan mga nagadan sa nagguhong siyam na eskalon sa sarong edificio sa Angeles City, Pampanga.
Segun sa Bureau of Fire Protection (BFP) Central Luzon, narekober an hawak kan sarong omboy sa Quadrant 2 kan disaster site bandang alas-sais uno nin banggi, mantang nagpapadagos an search and retrieval operations.
Sinabi ni Fire Superintendent Maria Leah Sajili, Regional Public Information Officer kan BFP-Central Luzon, dai pa pigkukumpirma an pagkakakilanlan kan omboy mantang pigsasairarom ini sa pagbusisi kan Scene of the Crime Operatives (SOCO).
Enot nang nagluwas sa mga report hale sa mga survivor na posibleng igwang mga joven sa construction site huli ta digdi temporaryong pigpapatenir kan nagkapirang obrero an saindang pamilya.
Sa ngonian, piga-aram pa kan mga otoridad kun an omboy kaiba sa mga nagtetenir sa lugar.
An nabanggit na biktima, nakadagdag sa mga listahan kan mga nagadan sa insidente kun sain kaiba an mga construction worker, karatig na tindero, sarong turistang Malaysian na nagtetenir sa kataid na hotel, asin iba pang biktima.
Padagso man liwat an clearing operations kan mga responder sa pag-laom na igwang makukuwa na mga biktima sa irarom kan pagguho kan edificio.
