LEGAZPI CITY – Ipigheras kan liderato kan City Government of Legazpi an pag-abot sa Albay kan panibagong 112 linemen na hale sa National Grid Corporation of the Philippines (NGCP) na matabang sa pagbabalik kan suplay kan kuryente sa dakol pang lugar.
Sa intrevista kan Bombo Radyo Legazpi ki Mayor Noel Rosal, duwang aldaw sanang magtetenir sa provincia an mga nasabing linemen na mayor na matututok sa upland areas kan segundo asin tercer distrito.
Inako kan alkalde na nadidificilan an APEC na maghire nin mga panibagong trabahante na makakatabang sa pagrestore kan power supply.
Nasasabutan man suboot kan opisyal an pagpapagal kan mga ini urog na sa paspas na trabaho na pighahagad.
Segun pa ki Rosal, wara pa sa kabangaan kan ciudad an napapailawan sa ngonian asin nasa 30 hasta 35% pa sana sa pagkalkula.
Ipigtutukdong rason sa problema an putol na mga linya, naraot na mga transformer asin iba pang local problem.
