LEGAZPI CITY – Pinunan na an pinag-aabangan na 2024 Private Schools Athletic Association National Games sa ciudad nin Legazpi.
Maabot sa 10,000 na mga atleta, coaches asin delegado hali sa mga pribadong eskwelahan sa manlain-lain na parte kan Pilipinas ang kasabay sa aktibidad.
Saro sa mga pangenot na nakatutok ngunyan sa aktibidad an Philippine National Police na nagtatao nin seguridad para sa event.
Nasa 800 na mga pulis an ipig-deploy sa mga billeting centers asin venue kan aktibidad ngani na mapangatamanan an seguridad kan mga kasabay sa event.
Sa isinagibong send off ceremony para sa mga pigdeploy na pulis, nangapudan si Philippine National Police Regional Office 5 Regional Director PBGen. Andre Perez Dizon itao na an gabos na makakaya kan kapulisan ngani na maipamati sa mga delegado an mahigot na seguridad sa Bicol.
Naglalaom man ini na wara nin mangyayaring dae pinaglalaoman na insidente asin magiging matrayumpo an pagsasagibo kan aktibidad.
