Pigtutubudang nasa Portugal si dating Ako Bicol Representative Elizaldy “Zaldy” Co sa tahaw kan nagpapadagos na pag-arestar sa mga imbuelto sa suboot anomalya sa flood control projects sa Oriental Mindoro, susog sa Department of the Interior and Local Government (DILG).
Segun ki DILG Secretary Jonvic Remulla, posibleng may duwang passport si Co kabale an sarong Portuguese passport na suboot nakuwa niya, dakol nang taon na an nakakalihis.
Segun ki Remulla kanselado na suboot an saiyang Philippine passport, alagad nagkawsa nin komplikasyon an suboot pagkakaigwa niya nin dual travel documents.
Wara man na extradition treaty ang Pilipinas asin Portugal kaya posibleng maging angat an pag-arestar kun mapapatunayang nasa nacion na ini an dating kongresista.
Siring man ipinasa na kan DILG sa Department of Foreign Affairs an orolay kan extradition.
Nangapodan man si Remulla sa mga Pilipino sa abroad na tolos na i-report, kuwaan nin ladawan, asin i-post online kun mahihiling si Co nganing makatabang sa pag-aram kan saiyang kinaroroonan.
Kan Nobyembre 21, inanunsyar ni Presidente Ferdinand Marcos Jr. na may iniluwas nang warrant of arrest laban ki Co asin 15 iba pa, kabale an pirang opisyal kan DPWH asin Sunwest Corp.
Ini kasunod kan pagsunad kan Ombudsman nin kasong corruption asin malversation of public funds sa Sandiganbayan katakod kan suboot anomalya sa P289 million flood control project sa Oriental Mindoro.
