Pinaglalaoman kan Department of Interior and Local Government (DILG) na posible nang maresibe an red notice hali sa International Criminal Police Organization (Interpol) kontra ki dating Ako Bicol Partylist Rep. Zaldy Co.
Segun ki DILG Secretary Jonvic Remulla na pinaglalaoman ninda an kumpirmasyon kaini puon ngunyan na semana hasta sa masunod na semana makalihis mag-apply nin notice an gobierno kontra sa dating kongresista.
Dugang pa kan opisyal na nagtetenir man liwat an dating kongresista sa Portugal asin dae man pinag-aantisiparan na mapasiring ini sa ibang nacion.
Marurumduman na Nobyembre kan nakalihis na taon kan magpaluwas nin blue notice an Interpol kontra ki Co para sa iba pang mga impormasyon dapit sa pagkakakilanlan kaini asin kun sain an eksaktong lokasyon niya katakod kan pigkakahampang na kaso na may kinaaraman sa flood control scandal.
Mientras tanto, sinierto man kan gobierno na sa ibong kan presenteng isyu asin krisis na pigkakahampang kan nacion, dae man liwat nalilingawan an mga enot na isyu katakod kan flood control asin sinierto na papanimbagon sa ley an mga personalidad sa likod kaini.
