LEGAZPI CITY-Ipighayag ni President Donald Trump na plano nindang pag-olayan ni Chinese President Xi Jinping an pagbakal nin armas kan Estados Unidos sa Taiwan sa saindang papaabot na miting sa Beijing.
Segun kay Trump, mawot ni Xi na punduhon kan Amerika an pagtatao nin armas sa Taiwan kaya kaiba ini sa saindang pangenot na isyu na pag-oolayan.
Nakatakdang magpasiring si Trump sa Beijing ngonian na aldaw bago an bilateral talks na isasagibo sa Huwebes asin Biyernes. Ini an kaenot-enoting pagbisita niya sa China sa nakalihis na siyam na taon.
Haloy nang pigpoonan kan tensyon sa pagultanan kan Washington asin Beijing an suporta militar kan Estados Unidos sa Taiwan.
Pigkokonsidera man kan China na parte kan saindang teritoryo an self-governed island mantang nanindugan an Taiwan na tutol sinda sa mga patanid kan mga militar hale sa Beijing.
An Estados Unidos an pangenot na kaalyado kan Taiwan asin padagos na nagtatao nin defense support sa isla.
Marurumduman na kan Disyembre, inanunsyo ni Trump an labi sa $11 bilyong military package para sa Taiwan.
Kasunod kaini, nagsagibo man an China nin mahiwasang military drills na nagpoon suboot bilang simulation kan blockade sa mga pantalan kan Taiwan, na pigkokonsiderang patanid laban sa mga nacion na nagsusuporta sa nasabing isla.
Sa tahaw kan mainit na tensyon, sinabi ni Trump na nagtutubod siya na dai mahantong sa armadong sigalot an sitwasyon huli sa maayos na koneksyon kay Xi Jinping.
