LEGAZPI CITY-Nangapudan an Department of Foreign Affairs (DFA) sa China na siguraduhon an karahayan asin direchos kan labi sa 100 na mga Pilipino na inaresto huli suboot sa iligal na pagtatrabaho.
Kinumpirmar kan DFA an mass arrests makalihis na sabihon kan Chinese Foreign Ministry na naggibo ini nin aksyon laban sa labing 100 na mga Pilipino na pigtutubudang nagtatrabaho nin ilegal sa China.
Sinabi kan DFA na pigmimidbid kan Pilipinas an direchos kan China na ipaotob an sadiring ley sa imigrasyon, basta nasusunod an due process.
Sa ibong kaini, hinagad kan ahensya sa mga otoridad kan China na protehiran an karahayan kan mga nakadetene na Pilipino asin tulos na ipaaram sa Philippine Foreign Service Posts an saindang detensyon.
Segun sa DFA, susog ini sa Vienna Convention on Consular Relations asin sa 2013 Philippines-China Consular Agreement.
Nakikipagkoordinar na an DFA sa Philippine Embassy sa Beijing asin sa Philippine Consulates-General sa China ngani madeterminaran an eksaktong numero kan mga Pilipino na nadakop asin an mga rason sa likod kan saindang pagkakulong.
Pig-rerepaso naman kan ahensya kun may mga legal asin consular procedures na sinunod sa pagdakop sa mga Pilipino.
Mientras tanto, makusog na pigtuyaw ni Defense Secretary Gilbert Teodoro an pagdakop kan China sa mga Pilipino.
Inapod niya ining sarong porma nin “blackmail” asin kinondena an suboot paggamit sa mga Pilipino bilang paagi ngani makiaram sa proseso nin pagpapaotob kan ley sa Pilipinas.
