LEGAZPI CITY—Nagresulta sa pagkakabuwag kan sarong drug den asin pagkakaarestar kan tulong indibidwal an ikinasar na buy-bust operation kan mga otoridad sa Purok 6, Barangay Basud, Sitio Labanon sa banwaan kan Bacacay, Albay.
Naarestar an mga suspek na sinda alyas Jun, 47-anyos, may agom, sarong paraooma asin residente kan nasambitang lugar; alyas “Jer” 30-anyos, may live in partner, construction worker asin residente kan Purok 2, Barangay Pili-Ilawod, Bacacay, Albay; asin alyas “Toni”, 34-anyos, truck helper, warang agom asin residente kan Brgy. Pili-Ilawod, kan nasambitang banwaan.
Nakumpiskar sa operasyon an nasa 10 gramos nin pigtutubudang shabu asin may standard drug value na P68,000, kaiba an buy-bust money asin iba pang drug paraphernalia.
Pinangenotan an operasyon kan Philippine Drug Enforcement Agency Albay Provincial Office, PDEA Catanduanes Provincial Office asin Bacacay Municipal Police Station.
Mahahampang an mga naarestar na indibidwal sa pagbayolar sa Sections 5, 6, 7, 11, 12, 15, Article II kan Republic Act 9165 o an Comprehensive Dangerous Drugs Act of 2002.
