Sienerto kan Philippine National Police (PNP) na warang mangyayari na special treatment sa pagsirbi nin warrant of arrest kan International Criminal Court (ICC) kay Senator Ronald Bato dela Rosa.
Ini an oras na ganap nang maipaotob an pagsirbi kan arrest warrant laban sa senador.
Segun ki PNP Chief, PGen. Jose Melencio Nartatez Jr., na maski pa dating chief PNP si dela Rosa, gigibohon ninda an saindang mandato kan warang takot o warang pigpapaburan, ini man an saindang mga operasyon o pagseserbi nin warrant of arrest.
Sinabi ni Nartatez, sinda sa PNP an pirmihang pighahanda an mga sadiri asin hanay sa paghampang sa mandato nganing mapahigot pa an saindang operasyon.
Afuera digdi, mahigot man an pakikipagtabangan ninda sa sa Department of Justice (DOJ) asin iba pang law enforcement agencies, nganing masierto na naipaotob nin tama an ley.
