LEGAZPI CITY-Padagos na pigbabantayam an Low Pressure Area (LPA) sa Philippine Area of Responsibility (PAR) kan nacion.
Segun kay State Weather Bureau Jaime Bordales, sa intrevista kan Bombo Radyo Legazpi na huring nanotaran an sentro kan LPA na nasa distansyang 6.74 km sa sirangan kan Borongan City sa Eastern Samar.
Mantang Southwest Monsoon o Habagat man giraray an makakaapektar sa Western section kan Southern Luzon asin Northern section kan Mindanao.
Maapektaran man kan habagat, trough, asin LPA an rehiyon Bicol kun sain makakaeksperyensya nin madadampog na kalangitan dara kan kalat-kalat na paguuran.
Laoman man suboot na mahiro an LPA sa masunot na 2 hasta 3 aldaw kun sain laoman an pagrahay kan panahon sa rehiyon.
Sa kadagatan kan Bicol an wara man suboot nin nakabanderang warning asin laoman an banayad asin moderatong hukol na igwang pigestimar na langkaw na nasa 0.5 – 1.5 meters.
Alagad, magingat man suboot sa biriglaan na thunderstorm na dara kan pagkusog kan duros sa mga kadagatan sa rehiyon.
Makakamati man nin pinakahababa sa 24 degree celsius an rehiyon Bicol asin pinakahalangkaw na temperatura na nasa 31 degree celsius.
Hababa man suboot an tyansa na mabilog bilang bagyo an LPA sa masunod na 24 oras alagad, igwang tsansa sa masunod pang mga alda kun sain pigbabantayan pa ini sa kadagatan.
Enakso suboot na mabilog bilang sarong bagyo, an aapodon ini sa lokal na pangaran na “Jacinto”.
Huli sa LPA trough, asin habagat, laoman an padagos na paguuran sa rehiyon kan Bicol.
Mensahe man kan opisyal sa publiko na pirmihang magantabay sa abiso kan PAGASA manungod sa weather system na nakakaapektar sa kapalibutan.
Pigpapagirumduman man an gabos na makakaeksperyensya nin mga paguuran an rehiyon kun sain laoman an posibleng flash flood asin mudflood orog na sa mga hararani sa kabuludan asin sa mga nasa hazard na lugar na makipagkoodinar sa mga ahensya asin opisyal para sa posibleng pag-ebakwar huli sa laomang paguuran na pwedisir magdara nin peligro.
