LEGAZPI CITY-Pauli na an mga delegado kan Bicol Region makalihis an isinagibong Palarong Pambansa ngonian na taon sa Agusan Del Sur.
Segun kay DepEd Bicol Regional Sports Officer Francisco Dexter Sison, na haros gabos pauli na alagad saro pang dibisyon gikan sa Camarines Norte an papauli pa sana saaga.
Bitbit kan Bicol Region an 13 gold medals mantang 19 naman ang silver medals.
Sinabi ni Sison na mas dakol ini kumparar kan nakalihis na taon, na nasa anom na gold medals.
Dai man suboot niya piglaoman na makalaog sa top 10 an rehiyon huli ta basado sa tracking kan mga probinsya harani sa Mindanao Region, mas nag-step up sinda asin iba talaga an home court.
Difisil suboot na makalaog sa rank alagad ibig sabihon nasa 120% – 130% increase an rehiyon sa ngonian gikan sa 6 to 13 gold medals.
Nagin sekreto man an puspusang training asin suporta kan mga stakeholders asin local government units, siring man an leaderhip kan Department of Education.
Kasunod kaini, sinabi ni Sison na dadarahon kan mga delegado an experience sa Palarong Pambansa, orog na nakagibo nin historya sa lado kan swimming si Rile Maddeleign Alindogan para sa Bicol Region.
Nagpapasalamat man siya sa mga magurang kan mga aki para sa suporta, siring man sa gabos na nagin parte kan trayumpo kan bilog na rehiyon sa Palarong Pambansa 2026.
