LEGAZPI CITY-Padagos na pinagbabantayan kan mga eksperto an Tropical Storm Fung-Wong, na aapodon na “Uwan” enkaso makalaog na ini sa Philippine Area of Responsibility (PAR).
Kasunod kaini, ipigpapaotob na kan Department of the Interior and Local Government (DILG) ang preparatory evacuations sa gabos na mga high risk na mga komunidad, bago pa man an Nobyembre 9, 2025 sa Domingo, huli sa posibleng epekto kaini mantang dai pa naglalaog sa PAR.
Huri ining nanotaran sa rayong 1,660 kilometro sa west kan northwestward kan Mindanao.
Dara kaini an kusog ki paros na nasa 75 km/h harani sa sentro asin may pagbugso kan paros na nagaabot sa 90 km/h.
Basado sa obserbasyon kan state weather bureau, haros dai ini naghihiro sa mga nakalihis na oras.
Mientrastanto, an Typhoon Tino an paluwas na kan nacion.
Nanotaran an Typhoon Tino sa rayong 475 kilometro kan west-northwest kan Pag-asa Island, Kalayaan, Palawan.
Dara man giraray kaini an kusog ki paros na nasa 165 km/h harani sa sentro, asin pagbugso na nagaabot sa 205 km/h mantang naghihiro o pa-kanluran sa rikas na 25 km/h.
